Mu gihe hasigaye iminsi 24 ngo hatangire umwaka wa Mutuelle de Santé wa 2020/2021, imiryango ibihumbi 42 777 niyo yonyine imaze kwishyura umusanzu w’ubwisungane mu kwivuza (Mutuelle de Santé ) ya 2020/2021. Ikigo RSSB rero kirakangurira abanyamuryango b’ubwisungane mu kwivuza kwishyura vuba kugira ngo bazabashe kwivuza.  

 

Ibi byatangajwe n’ Umuyobozi Mukuru wa RSSB, Regis Rugemanshuro ubwo yari mu kiganiro n’abanyamakuru kuri uyu wa Gatanu tariki ya 6 Gicurasi 2020 ubwo hatangizwa ubukangurambaga bwa Mutuelle 2020/2021.  

 

Umuyobozi Mukuru wa RSSB, Regis Rugemanshuro, yavuze ko kugeza muri Gicurasi 2020, abanyarwanda bangana na 79.6 % aribo bari bamaze kwishyura ubwisungane mu kwivuza bw’umwaka uri kurangira wa 2019/2020. Yavuze ko kandi uwo mubare wiyongereyeho 1.1 % ugereranyije n’abanyarwanda 78.5 % bari bishyuye ubwisungane mu kwivuza mu mwaka wa 2018/2019.  

 

Yagize ati: “ Kugeza ubu imiryango 42 777 ifite abanyamuryango 198 644 ni bo bonyine bamaze kwishyura umusanzu w’ umwaka wa 2020/2021; niyo mpamvu dushishikariza Abanyarwanda bose gukomeza kwishyura umusanzu usabwa (kwishyurira abagize urugo bose)’’.  

 

Umuyobozi mukuru wa RSSB avuga ko kuba umusanzu utaratanzwe ku gipimo cy’ijana ku ijana nkuko biba byitezwe; imwe mu mpamvu zibitera ari ikibazo cy’imyumvire .  

 

Ati :”Ikibazo navuga cyatumye tutagera ku ijana ku ijana, ni ikibazo cy’imyumvire abantu bumva ko batarwara bakavuga ko bishyura Mituweli [ubwisungane mu kwivuza] ntibarware, bakumva ko bishyurira ubusa nk’urubyiruko ati’’ njyewe ndi umusore; sinjya kwa muganga keretse iyo nasitaye”.  

 

Umunyamabanga wa Leta muri Minisiteri y’Ubutegetsi bw’Igihugu, Nyirarukundo Ignatienne ushinzwe imibereho myiza y’abaturage, yavuze ko icyifuzo ari uko abanyarwanda bose bagira ubwisungane mu kwivuza nta n’umwe uvuyemo.  

 

Ati “Ikigamijwe ni uko buri munyarwanda wese agira ubwishingizi bw’ubuzima. Haracyari benshi badafite ubwishingizi, aho turi rero ntabwo wavuga ko hashimishije turifuza ko ababikora bagera ku 100 %”  

 

Umunyamabanga wa Leta muri MINALOC, avuga ko nta muntu n’umwe ugomba gukerensa ubwisungane mu kwivuza bitewe n’uko ngo ari kimwe mu by’ibanze bikenewe mu Rwanda.  

 

Ingamba zarafashwe mu rwego rwo gukangurira abanyamuryango kwishyura Mituweli y’umwaka wa 2020/2021  

 

Umuyobozi Mukuru wa RSSB, Regis Rugemanshuro avuga ko mu biteganyijwe gukorwa mu rwego rwo gukangurira abanyarwanda kwishyura Mutuelle hanubahirizwa ingamba zo kwirinda COVID-19 hazifashishwa ikoranabuhanga nko gutanga ubutumwa bugufi bwibutsa abantu kwishyura (Bulk SMS) , gukomeza gukorana cyane cyane n’ itangazamakuru (Media), hari kandi no gukomeza ubukangurambaga bushishikariza abanyamuryango ba Mituweli kwishyura hifashishijwe ikoranabuhanga kuko ryabyoroheje.  

 

Umunyamabanga wa Leta ushinzwe imibereho myiza y’abaturage, Nyirarukundo Ignatienne yavuze ko kandi hazakorwa ubukangurambaga urugo ku rugo hifashishijwe indangururamajwi mu rwego rwo gushishikariza abanyamuryango kwishyura, cyane ko bitakunda muri iki gihe cya Covid -19 ko abantu bateranira hamwe nk’uko byakorwaga.  

 

Kwishyura Mutuweli bikorwa hashingiwe ku cyiciro cy’Ubudehe umuturage abarizwamo. Abo mu cyiciro cya mbere bishyurirwa na Leta amafaranga 3000 frw ku muntu, abo mu cya kabiri n’icya gatatu bishyura 3000 Frw naho abo mu cyiciro cya kane bo bishyura 7000 Frw.  

 

Kwishyura umusanzu w’ ubwisungane mu kwivuza bikorwa mu buryo butandukanye burimo ubw’ikoranabuhanga nko kuri telefone aho ukanda *909# ugakurikiza amabwiriza, ushobora kwishyura kandi muri SACCO zose , kwishyura hifashishijwe abakozi b’Irembo cyangwa abakozi (agents) ba MOBICASH bari mu gihugu hose.  

 

Nyuma y’uko hakuweho iminsi 30 yo gutegereza kugirango umunyamuryango mushya cyangwa uwakerewe gutanga umusanzu abone serivisi z’ubuvuzi, umusanzu wa Mutuelle uzajya urangirana n’umwaka wa Mutuelle (ku wa 30 Kamena).